Viðburðadagatal
Dagskrá Rauðakrosshússins 1.-5.febrúar
Borgartún 25,
Sálrænn stuðningur verður á mánudaginn þar sem fjallað er um áhrif áfalla á andlega líðan fólks. Enskuhópurinn heldur áfram og sömuleiðis skákklúbburinn.
Á þriðjudaginn verður sögð reynslusaga konu sem varð móðir þegar hún var enn í 10. bekk, en sonur hennar er nú sjálfur í efsta bekk grunnskóla. Hún talar um áfallið, fordómana, stuðninginn og árangurinn. Fyrirlestur sem kemur skemmtilega á óvart.
Lilja frá Art of living kennir síðan gestum að anda rétt, íhuga og lifa meira í núinu í stað þess að velta sér upp úr gærdeginum.
Á miðvikudaginn verður fyrsti fyrirlesturinn af þremur um ræktun fyrir sumarið og í þetta sinn verður sjónum okkar beint að sumarblómunum.
Á fimmtudaginn hefst námskeið fyrir byrjendur í fluguhnýtingum og nauðsynlegt að skrá sig á það, en þetta er fyrsti hluti af fjórum.
Vikunni lýkur síðan með trommuhring þar sem allir geta lært bumbuslátt og búið til rythma saman. Ef þú átt trommu (bongo-, Congas- eða djembe-) endilega kipptu henni með!
Sjálfboðaliðar Rauða krossins veita stuðning og jafningjaráðgjöf á opnunartíma Rauðakrosshússins og prestar/djáknar eru með viðveru mánudaga til föstudaga milli klukkan 14 og 16.
ATH nýtt! - ráðgjöf fyrir íbúa af erlendum uppruna.
Alla miðvikudaga kl. 14:00-16:00 er boðið upp á ráðgjöf fyrir innflytjendur á Íslandi í Rauðakrosshúsinu. Ráðgjöfin er viðbót við þá aðstoð sem nú þegar er í boði. Ekki er hægt að panta tíma. Ef þörf er á túlki þarf að tilkynna starfsmönnum Rauðakrosshússins það eigi síðar en degi fyrir heimsókn þ.e. á þriðjudegi í síma 570 4000.
Lögfræðingarnir sem veita ráðgjöf í Rauðakrosshúsinu eru: Gentiana Collaku og Katla Þorsteinsdóttir.
