Skip to main content
Frétt

17 útskrifast frá Hringsjá

By 26. maí 2009No Comments
Þann 20. maí sl. útskrifuðust 17 nemendur frá Hringsjá – náms- og starfsendurhæfingu.

Athöfnin fór fram í húsnæði skólans að Hátúni 10d í Reykjavík. Þeir nemendur sem útskrifaðir voru að þessu sinni eru nær allir skráðir í framhaldsnám eða hafa tryggt sér atvinnu á almennum markaði.Útskriftarnemar Hringsjár vorið 2009
Tilgangur Hringsjár er að veita náms- og starfsendurhæfingu fyrir einstaklinga, 18 ára og eldri sem vegna sjúkdóma, slysa, fötlunar eða annarra áfalla þurfa á endurhæfingu að halda til að takast á við nám og/eða að stunda atvinnu á almennum vinnumarkaði.

Útskriftarnemendur Hringsjár hlutu óskafugla að gjöf við útskrift. Þórunn Árnadóttir vöruhönnuður sérhannaði 17 fugla sérstaklega af þessu tilefni.

Hringsjá hefur verið starfrækt frá árinu 1987 og er rekin á grundvelli laga um vinnumarkaðsaðgerðir, almannatryggingar og málefni fatlaðra. Öryrkjabandalag Íslands ber ábyrgð á rekstrinum. Umsóknum um nám í Hringsjá fjölgar stöðugt, og einungis er hægt að verða við um 20% þeirra. Nemendur Hringsjár koma frá mörgum sveitarfélögum, en langflestir frá Reykjavík, Hafnarfirði og Kópavogi.

Hringsjá frumkvöðull á sviði nútíma náms- og starfsendurhæfingar.

Endurhæfingin felst í einstaklingsmiðuðu námi í formi styttri námskeiða eða fullu einingarbæru námi með sérhæfðri ráðgjöf og stuðningi. Námið miðast við að:Óskafugl - viðurkenning til útskriftarnema

  • leggja eða endurnýja almennan þekkingargrunn einstaklinga.
  • undirbúa einstaklinga fyrir almenn skrifstofu- og þjónustustörf.
  • efla persónulega færni einstaklinga.
  • efla félagslega færni einstaklinga.
  • auka samfélagslega þátttöku einstaklinga.
  • auka lífsgæði einstaklinga og fjölskyldna þeirra.

Rannsóknir sýna að árangur af náms og starfsendurhæfingu Hringsjár er afar góður og viðhorf brautskráðra nemenda jákvætt. Frá upphafi hafa alls 385 nemendur verið útskrifaður eftir fullt nám, en mun fleiri hafa lokið námskeiðum eða hluta af námi.

Hringsjá náms- og starfsendurhæfing er staðsett í Hátúni 10d, 105 Reykjavík.