Skip to main content
Frétt

Ályktun aðalfundar ÖBÍ 6. október 2007

By 6. október 2007No Comments
Aðalfundur Öryrkjabandalags Íslands var haldinn að Grand hóteli, laugardaginn 6. október síðastliðinn. Félagsmálaráðherra, Jóhanna Sigurðardóttir ávarpaði fundinn.

Í ávarpi félagsmálaráðherra, lýst Jóhanna því yfir að hún myndi kalla fulltrúa lífeyrissjóðanna á sinn fund vegna fyrirhugaðra skerðinga og niðurfellinga á örorkulífeyri. Tengill á ávarpið í heild sinni á heimasíðu félagsmálaráðuneytisins.Jóhanna Sigurðardóttir, félagsmálaráðherra flytur ávarp við byrjun aðalfundar ÖBÍ 2007

Á fundinum var Sigursteinn Másson fulltrúi Geðjálpar, endurkjörinn formaður bandalagsins. Halldór Sævar Guðbergsson fulltrúi Blindrafélagsins, var kjörinn gjaldkeri til tveggja ár. Meðstjórnendur voru kjörnir Sigríður Jóhannsdóttir fulltrúi Samtaka sykursjúkra og Sigurður Þór Sigurðsson fulltrúi Stryktarfélags vangefinna. Varamenn voru kjörnir þau Ragnar Gunnar Þórhallsson Sjálfsbjörg, Hjördís Anna Haraldsdóttir Félagi heyrnarlausra og Guðrún Pétursdóttir Umsjónarfélagi einhverfra.

Samþykkt var innganga tveggja nýrra félaga í bandalagið það eru, Hugarfar, félag fólks með heilaskaða, aðstandenda þess og áhugafólks um málefnið, og Vonin, hagsmunasamtök krabbameinsgreindra.

Á fundinum var eftir farandi ályktun samþykkt samhljóða:

Ályktun aðalfundar ÖBÍ 6. október 2007

Aðalfundur Öryrkjabandalags Íslands fagnar yfirlýstri stefnu stjórnvalda um umbætur í velferðarkerfinu, þar sem áhersla skal lögð á einföldun almannatryggingakerfisins, einstaklingsmiðaða þjónustu, aukna endurhæfingu og virka samfélagslega þátttöku fatlaðra. ÖBÍ leggur áherslu á að skipulagt verði eitt nýtt og betra almannatryggingakerfi fyrir alla landsmenn. ÖBÍ hafnar alfarið hugmyndum sem fulltrúar Alþýðusambands Íslands og Samtaka atvinnulífsins hafa kynnt um sérstakt tryggingakerfi fyrir hluta landsmanna. Jafnframt varar ÖBÍ mjög við hugmyndum sem miða að einkavæðingu almannatrygginga, sem er augljós ávísun á mismunun.
Undanfarin ár hafa skattar á fyrirtæki og á hæstu laun lækkað umtalsvert. Nú er tími lágtekjufólks kominn. ÖBÍ skorar á stjórnvöld að gera tillögur ÖBÍ um kjara-, skatta- og velferðarmál að sínum. ÖBÍ skorar ennfremur á Alþýðusamband Íslands og Samtök atvinnulífsins að koma í veg fyrir boðað afnám og niðurfellingu örorkulífeyris fyrir á annað þúsund öryrkja. Komi skerðing lífeyrissjóðanna til framkvæmda er ljóst að sjóðirnir hafa brugðist samtryggingarskyldum sínum og samfélagslegri ábyrgð. Þar með kynnu forsendur skylduaðildar að lífeyrissjóðunum að vera brostnar. Slíkar aðstæður hlytu að leiða til heildarendurskoðunar stjórnvalda á lögum um starfsemi lífeyrissjóðanna, þar sem hlutverk þeirra, skyldur og ábyrgð í íslensku samfélagi yrðu endurskilgreind.