Skip to main content
Frétt

Ályktun Aðalstjórnar ÖBÍ 6. desember 2007

By 7. desember 2007No Comments

Á fundi aðalstjórnar ÖBÍ í gær, 6. desmber, var samþykkt ályktun þar sem skorað var á Alþingi að tryggja þeim sem orðið hafa fyrir skerðingu og niðurfellingu af hálfu lífeyrissjóða þegar í stað fullan lífeyri. Einnig er í ályktuninni skorað á ASÍ að beita réttsýni í þágu félagsmanna sinna.

Ályktun Aðalstjórnar ÖBÍ 6. desember 2007

Aðalstjórn Öryrkjabandalags Íslands mótmælir og lýsir eindreginni andstöðu við yfirstandandi aðgerðir lífeyrissjóða gegn öryrkjum. Með aðgerðum sínum hafa stjórnir lífeyrissjóðanna sett kjör og réttindi öryrkja aftast í forgangsröðina og vegið harkalega að því samtryggingarhlutverki sem lífeyrissjóðunum er ætlað og er grundvöllur skylduaðildar landsmanna að lífeyrissjóðum. Fleiri lífeyrissjóðir hafa tilkynnt um aðgerðir og að óbreyttu munu aðgerðir sjóðanna rústa afkomu þúsunda Íslendinga á næstu 2-3 árum.

ÖBÍ skorar á Alþingi og ríkisstjórn að tryggja þeim sjúku og fötluðu, sem verða fyrir skerðingum og niðurfellingum af hálfu lífeyrissjóða, þegar í stað fullan lífeyri á móti. ÖBÍ skorar jafnframt á aðildarfélög Alþýðusambands Íslands, sem eiga fulltrúa í stjórnum lífeyrissjóðanna að beita sér nú af heilindum og réttsýni í þágu þeirra félagsmanna sinna sem mest þurfa á stuðningi heildarsamtaka launafólks að halda nú fyrir jólin.

Reykjavík, 6. desember 2007

Aðalstjórn ÖBÍ