Skip to main content
Frétt

Félagsráðgjafafélag Íslands harmar lögbrot sveitarfélaga

By 31. janúar 2014No Comments

Stjórn félagsins sendi frá sér yfirlýsingu í tilefni af fréttum frá Vesturbyggð og Fljótsdalshéraði:

Í fréttum RÚV hefur komið fram að Félagsþjónusta Vesturbyggðar býður ekki upp á skipulagða akstursþjónustu fyrir fatlað fólk eins og lög um málefni fatlaðs kveða á um. Þá úrskurðaði Persónuvernd nýverið að Félagsþjónusta Fljótsdalshéraðs hefði brotið lög um félagsþjónustu sveitarfélaga þegar hún krafði umsækjanda um fjárhagsaðstoð um þvagprufu og gerði að skilyrði að hann væri ekki í neyslu áfengis eða annarra vímuefna ætlaði hann sér að fá framfærslu frá sveitarfélaginu.

Félagsráðgjafar eru lykilstétt í félagsþjónustu sveitarfélaga og vinna að lausn félagslegra og persónulegra vandamála, tala máli skjólstæðinga sinna og vinna gegn mannréttindabrotum. Félagsráðgjafafélag Íslands harmar þessar fréttir af lögbrotum sveitarfélaganna og skorar á þau að standa undir ákvæðum laga um þjónustu sem íbúar þeirra eiga ótvíræðan rétt á og brjóta ekki á mannréttindum íbúa sinna.