Skip to main content
Frétt

Hringsjá útskrifar 17 nemendur

By 25. maí 2011No Comments

Rúmlega 60 nemendur stunda fullt nám við skólann og mun fleiri ljúka stuttum námskeiðum.

Þann 18. maí sl. voru 17 nemendur útskrifaðir frá Hringsjá – náms- og starfsendurhæfingu eftir 2 ára nám. Athöfnin  fór fram í húsnæði skólans að Hátúni 10d í Reykjavík. Fjöldi gesta var viðstaddur athöfnina og Svavar Knútur flutti tónlist og Guðrún Sigurjónsdóttir, sérfræðingur í Velferðarráðuneytinu flutti hátíðarávarp. Aðrir nemendur fengu afhentar einkunnir. Nemendur sem útskrifuðust að þessu sinni hafa flestir verið skráðir í framhaldsnám eða hafa tryggt sér atvinnu á almennum markaði.
Útskriftarnemar Hringsjár vorið 2011
Tilgangur Hringsjár er að veita náms- og starfsendurhæfingu fyrir einstaklinga,18 ára og eldri sem vegna sjúkdóma, slysa, fötlunar eða annarra áfalla þurfa á endurhæfingu að halda til að takast á við nám og/eða að stunda atvinnu á almennum vinnumarkaði.

Anna ekki eftirspurn

Hringsjá hefur verið starfrækt frá árinu 1987 og er reking á grundvelli laga um vinnumarkaðsaðgerðir, almannatryggingar og málefni fatlaðra. Öryrkjabandalags Íslands ber ábyrgð á rekstrinum. Umsóknum um nám í Hringsjá fjölgar stöðugt, og einungis er hægt að verða við um 20% þeirra. Nemendur Hringsjár koma frá mörgum sveitarfélögum, en langflestir frá Reykjavík, Hafnarfirði og Kópavogi. Rúmlega 60 nemendur stunda fullt nám við skólann og mun fleiri ljúka stuttum námskeiðum.

Einstaklingsmiðað nám

Endurhæfingin felst í einstaklingsmiðuðu námi í formi styttri námskeiða eða fullu einingarbæru námi með sérhæfðri ráðgjöf og stuðningi.  Námið miðast við að:

  • leggja eða endurnýja almennan þekkingargrunn einstaklinga
  • undirbúa einstaklinga fyrir almenn skrifstofu- og þjónustustörf
  • efla persónulega færni einstaklinga
  • efla félagslega færni einstaklinga
  • auka samfélagslega þátttöku einstaklinga
  • auka lífsgæði einstaklinga og fjölskyldna þeirra

Segja má að Hringsjá sé frumkvöðull á sviði nútíma náms- og starfsendurhæfingar. Rannsóknir sýna að árangur af náms og starfsendurhæfingu Hringsjár er afar góður og viðhorf brautskráðra nemenda jákvætt.

434 nemendur útskrifaðir eftir fullt nám frá Hringsjá

Frá upphafi hafa alls 434 nemendur verið útskrifaður eftir fullt nám, en mun fleiri hafa lokið námskeiðum eða hluta af námi. Hringsjá náms- og starfsendurhæfing er staðsett í Hátúni 10d, 105 Reykjavík.