Skip to main content
Frétt

Hvatningarverðlaun ÖBÍ veitt öðru sinni á alþjóðadegi fatlaðra 3. desember

By 28. nóvember 2008No Comments
Undirbúningsnefnd valdi þrjár tilnefningar úr hverjum flokki. Sérstök dómnefnd tók síðan endanlega afstöðu til verðlaunahafa sem kunngert verður við verðlaunaafhendinguna sem fram fer þann 3. desember, í Salnum í Kópavogi.

Í ár er alþjóðadagur fatlaðra haldinn undir kjörorðinu: Virðing og réttlæti fyrir alla.

Þann 3. desember á alþjóðadegi fatlaðra verða Hvatningarverðlaun Öryrkjabandalags Íslands veitt öðru sinni til þeirra sem með jákvæðum hætti hafa stuðlað að einu samfélagi fyrir alla.

Veitt verða þrenn verðlaun, til fyrirtækis, stofnunar og einstaklings, sem þykja hafa skarað fram úr og endurspeglað nútímalegar áherslur um jafnrétti, sjálfstætt líf og þátttöku fatlaðra í samfélaginu.

Tilnefningar

Leitað var til aðildarfélaga ÖBÍ, fulltrúa ÖBÍ í svæðiráðum um málefni fatlaðra og ýmissa annarra aðila sem vinna að málefnum fatlaðra um tilnefningar. Nokkur fjöldi tilnefninga barst. Undirbúningsnefnd valdi þrjár tilnefningar úr hverjum flokki sem sérstök dómnefnd tók endanlega afstöðu til.

Í flokki einstaklinga

Adolf Ingi Erlingsson, fyrir ötult starf í að auka umfjöllun um íþróttir fatlaðra.
Guðjón Sigurðsson, fyrir sýnileika, dugnað og árangur í málefnum fatlaðra.
Elín Ebba Ásmundsdóttir og Auður Axelsdóttir, fyrir frumkvöðlastarf þeirra við uppbyggingu sjálfshjálpar geðfatlaðra, stofnun Hugarafls og A/E Starfsendurhæfingar.

Í flokki fyrirtækja

Kaffitár, fyrir 1. flokks aðgengi í verslun sinni, Borgartúni 10.
Kompás, fyrir vandaða umfjöllun um málefni fatlaðra sem hefur styrkt baráttu þeirra.
Tónstofa Valgerðar, fyrir frumkvöðlastarf í þá veru að nemendur með sérþarfir njóti forgangs til tónlistarnáms.

Í flokki stofnana

Akureyrarbær – búsetudeild, fyrir frumkvöðlastarf í útfærslu á “Independent living”, notendastýrðri þjónustu fyrir fatlaða.
Menntaskólinn á Egilstöðum, fyrir vandaða uppbyggingu á sértæku og einstaklingsmiðuðu námi.
Tryggingastofnun ríkisins, fyrir gott rafrænt aðgengi einstaklinga að upplýsingum, á Trygg – þjónustuvef.

Dómnefnd

Dómnefnd skipa Ólöf Ríkarðsdóttir fyrrverandi formaður ÖBÍ, Kristín Rós Hákonardóttir afrekskona í sundi, Kristín Ingólfsdóttir rektor HÍ, Sigmundur Ernir Rúnarsson, forstöðumaður fréttasviðs Stöðvar 2 og Þorkell Sigurlaugsson framkvæmdastjóri þróunarsviðs HR.

Hönnuður verðlaunanna

Þórunn Árnadóttir hannaði verðlaunin, en hún útskrifaðist af vöruhönnunardeild Listaháskóla Íslands vorið 2007. Hún hlaut tilnefningu af hönnunarblaðinu Forum AID, sem einn af 10 áhugaverðustu útskriftarnemum í hönnun/arkitektúr á Norðurlöndunum árið 2007.

Verndari verðlaunanna

Forseti Íslands, herra Ólafur Ragnar Grímsson, er verndari Hvatningarverðlauna ÖBÍ og mun hann afhenda verðlaunin.