Skip to main content
Frétt

ÖBÍ fagnar niðurstöðu Siðanefndar Sambands íslenskra auglýsingastofa

By 28. ágúst 2007No Comments
Siðanefnd Sambands íslenskra auglýsingastofa hefur komist að þeirri niðurstöðu að auglýsingar Öryggismiðstöðvarinnar með Lalla Johns hafi brotið gegn siðareglum sambandsins hvað snertir almennt velsæmi og hafi verið til þess fallnar að valda ástæðulausum ótta meðal almennings.

ÖBÍ taldi óviðunandi vinnubrögð af hálfu Öryggismiðstöðvarinnar og auglýsingastofunnar Himins og hafs að sýna einstakling í því ljósi sem gert var í umræddum auglýsingum og fagnar því niðurstöðu siðanefndar. Um leið er lýst furðu á viðbrögðum Öryggismiðstöðvarinnar við úrskurði siðanefndar en í yfirlýsingu frá fyrirtækinu reynir það að hvítþvo hendur sínar og varpa allri ábyrgð á málinu á persónuna Lalla Johns. Eins og glöggt má lesa í niðurstöðunni beinist úrskurðurinn klárlega að Öryggismiðstöðinni og auglýsingastofunni en ekki Lalla. ÖBÍ gerir að sjálfsögðu engar athugasemdir við það að öryrkjar eða aðrir afli sér tekna. Það verður hins vegar að gera þær kröfur til auglýsenda að þeir misnoti sér ekki aðstöðu sína og bága stöðu annarra og virði almennar siðareglur.

Öryrkjabandalagið styður það að aukið verði við þekkingu í öryggismálum svo lengi sem það er gert með siðsamlegum hætti. Þeim skilaboðum sem Öryggismiðstöðin vildi koma á framfæri í auglýsingunni hefði vel mátt ná fram án þess að gera það með þeim ósiðlega hætti sem gert var í auglýsingunni.