Skip to main content
Frétt

ÖBÍ veitir 5 milljónum í fötlunarfræðinám og rannsóknir

By 28. júní 2012No Comments

Undirritun samnings um samstarf Öryrkjabandalags Íslands og Háskóla Íslands um fötlunarfræði

Í dag, 28. júní 2012, undirrituðu Kristín Ingólfsdóttir, rektor Háskóla Íslands og Guðmundur Magnússon, formaður Öryrkjabandalags Íslands samstarfssamnig um kennslu og rannsóknir á sviði fötlunarfræða við Háskóla Íslands. Markmið samningsins er að styrkja kennslu, rannsóknir, framþróun og stefnumörkun á fræðasviðinu og í málefnum fatlaðs fólks.

Samstarfssamningurinn felur í sér að Öryrkjabandalag Íslands veitir allt að fimm milljónum króna til að stuðla að því að gera nám í fötlunarfræðum aðgengilegt nemendum í grunnnámi (BA, BS, BEd og sambærilegu námi). Styrkurinn verður notaður til að kanna hvort og þá með hvaða hætti unnt er að stofna til grunnnáms í fötlunarfræðum sem aukagrein við Félags- og mannvísindadeild.

Með samningnum vill Öryrkjabandalagið efla samstarf og tengsl við fræðasamfélagið, stuðla að betra aðgengi sem flestra að námi í fötlunarfræðum. Framlag Öryrkjabandalagsins endurspeglar vaxandi áherslu á að vönduð og fræðileg vinnubrögð verði höfð að leiðarljósi í framþróun og nýsköpun í málefnum fatlaðs fólks hér á landi.

Samningurinn tekur gildi 1. júlí árið 2012.

Undirritun samnings ÖBÍ við Hí um nám og rannsóknir í fötlunarfæðum