Skip to main content
Frétt

Samstarf Öryrkjabandalags Íslands og HÍ um fötlunarfræði

By 30. júní 2010No Comments
Í dag, mánudaginn 28. júní, undirrituðu Guðmundur Magnússon, formaður Öryrkjabandalags Íslands og Kristín Ingólfsdóttir, rektor Háskóla Íslands tvo samstarfssamninga um kennslu og rannsóknir á sviði fötlunarfræði við Háskóla Íslands. Athöfnin fór fram á Háskólatorgi. Markmið samninganna er að efla fræðastörf á sviði fötlunarfræða og styrkja þannig kennslu, rannsóknir, framþróun og stefnumörkun á fræðasviðinu og í málefnum fatlaðs fólks.

Samstarfssamningarnir fela í sér að Öryrkjabandalag Íslands kostar hálft starf lektors í fötlunarfræðum til tveggja ára og veitir jafnframt 6 milljóna króna framlag til rannsókna á félagslegum og efnahagslegum aðstæðum og mannréttindum fatlaðs fólks.

Til samstarfsins er stofnað í tilefni af 50 ára afmæli Öryrkjabandalags Íslands árið 2011 en á því ári verður Háskóli Íslands 100 ára. Með samningum þessum vill Öryrkjabandalagið efla samstarf og tengsl við fræðasamfélagið, stuðla að frekari rannsóknum og framþróun í málefnum fatlaðs fólks og styrkja fræðilegan grunndvöll að stefnumótun og ákvörðunartöku í þessum mikilvæga málaflokki.

Framlag Öryrkjabandalagsins endurspeglar vaxandi áherslu á að vönduð fræðileg þekking verði höfð að leiðarljósi í framþróun og nýsköpun í málefnum fatlaðs fólks hér á landi.

Samningarnir taka báðir gildi 1. júlí árið 2010.