Skip to main content
Frétt

ÖBÍ fordæmir ákvörðun kjararáðs

By 29. júní 2017No Comments

Öryrkjabandalag Íslands harmar þá ákvörðun kjararáðs að hækka laun embættismanna og forstöðumanna ríkisstofnana afturvirkt um leið og örorkulífeyrisþegar hafa ekki fengið kjarabætur um nokkurra ára skeið.

Sem dæmi má nefna að samkvæmt útreikningum BSRB, sem birtir eru með fyrirvara og fjallað var um í fréttum, fær Ríkisendurskoðandi rúmar 4,7 milljónir króna í eingreiðslu vegna afturvirkrar launahækkunar. Þá fær forstjóri Fjármálaeftirlitsins um fjórar milljónir. Sé þetta rétt jafngilda þessar eingreiðslur heildartekjum margra örorkulífeyrisþega í rúma 20 mánuði miðað við greiðslur á árinu 2017.

Þetta er ekki í fyrsta sinn sem almenningur í landinu og fólk sem minnst hefur milli handanna í íslensku samfélagi fær kaldar kveðjur sem þessar frá kjararáði. Þá er þetta í annað sinn á innan við ári sem Öryrkjabandalag Íslands finnur sig knúið til að fordæma  ákvarðanir ráðsins, en í október í fyrra hækkaði það laun þingmanna, ráðherra og forseta Íslands um mörg hundruð þúsund krónur á mánuði. Síðan þá hefur lífeyrir almannatrygginga ekki hækkað nema um rúmar 15 þúsund krónur.

Samkvæmt nýlegum rannsóknum lifa allt of mörg börn á Íslandi við skort. Ekki hefur tekist að tryggja öllum Íslendingum mannsæmandi framfærslu eða að fatlað fólk geti lifað sjálfstæðu lífi. Grunnréttur fólks er því ekki virtur og þar með fer ríkið ekki að alþjóðasamningum sem það hefur undirritað og lofað að undirgangast.  Því vekur þessi nýjasta hækkun kjararáðs  furðu.

Merkilegt er að hægt sé að veita þeim sem úrskurðirnir taka til, jafnvel fulltrúum sem hafa sætt þungri gagnrýni fyrir störf sín, umtalsverða hækkun á sama tíma og ekki er hægt að tryggja þeim sem verst standa möguleikann á viðunandi framfærslu.

Ákvörðun kjararáðs hlýtur þó að þýða að örorkulífeyrisþegar geti átt von á að fá loksins réttmæta kjarabót. Hún væri sambærileg þeirri sem embættismenn og forstöðumenn ríkisstofnana hafa nú fengið fyrirhafnarlaust.