Skip to main content
Frétt

Ólöf Ásta Farestveit forstjóri nýrrar stofnunar Barna og fjölskyldustofu

By 15. desember 2021No Comments
Ásmundur Einar Daðason mennta- og barnamálaráðherra hefur skipað Ólöfu Ástu Farestveit í embætti forstjóra nýrrar Barna- og fjölskyldustofu. Barna- og fjölskyldustofa mun taka við verkefnum Barnaverndarstofu en jafnframt gegna lykilhlutverki við samþættingu þjónustu í þágu farsældar barna.

Stofan mun enn fremur fara með tilgreind verkefni sem kveðið er á um í lögum um félagsþjónustu sveitarfélaga, lögum um þjónustu við fatlað fólk með langvarandi stuðningsþarfir, lögum um Greiningar- og ráðgjafarstöð ríkisins og lögum um þjónustu- og þekkingarmiðstöð fyrir blinda, sjónskerta og einstaklinga með samþætta sjón- og heyrnarskerðingu.

Í frétt á vef Stjórnarráðsins kemur fram að Ólöf Ásta hafi verið settur forstjóri Barnaverndarstofu frá 1. september sl. Hún starfaði sem sérfræðingur í Barnahúsi frá árinu 2001 og sem forstöðumaður Barnahúss frá 2007-2021.
Ólöf Ásta er með menntun á sviði uppeldis- og afbrotafræði og fjölskyldumeðferðar og hefur m.a. sérhæft sig í yfirheyrslutækni vegna skýrslutöku barna.