Upplýsingar

Algengar spurningar um upplýsingar

  • Hver er formaður ÖBÍ

    Þuríður Harpa Sigurðardóttir, þá varaformaður Sjálfsbjargar, var kjörin formaður ÖBÍ á aðalfundi bandalagsins haustið 2017. Hún hefur í sinni formennskutíð lagt mikla áherslu á kjaramál örorkulífeyrisþega, náið samstarf við verkalýðshreyfinguna og stjórnvöld. Einnig hefur verið unnið ötullega að heilbrigðismálum, aðgengismálum, málefnum sem tengjast atvinnu- og menntun, málefnum barna og sjálfstæðu lífi. Samningur Sameinuðu þjóðanna um réttindi fatlaðs fólks hefur verið lagður til grundvallar í starfi bandalagsins undir formennsku Þuríðar Hörpu.Þuríður Harpa Sigurðardóttir

  • Hvað er ÖBÍ?

    Öryrkjabandalag Íslands (ÖBÍ) er heildarsamtök hagsmuna og mannréttinda fatlaðs fólks á Íslandi stofnað 5. maí 1961. Bandalagið samanstendur af 43 aðildarfélagi fatlaðs fólks, öryrkja, einstaklinga með langvinna sjúkdóma og aðstandenda þeirra. Aðildarfélögin eru hagsmunasamtök ólíkra fötlunarhópa sem öll starfa á landsvísu. Hvert og eitt er með sérþekkingu á sínu sviði og veita margskonar fræðslu og stuðning. Samanlagður félagafjöldi þeirra er um 30 þúsund manns.

  • Hvert er hlutverk og hvað gerir ÖBÍ?

    Markmið ÖBÍ er að íslenskt þjóðfélag verði samfélag jöfnuðar og réttlætis þar sem allir einstaklingar, óháð líkamlegu og andlegu atgervi, njóti mannsæmandi lífskjara og jafnra möguleika til sjálfstæðs lífs og virkrar samfélagslegrar þátttöku.

    Hlutverk ÖBÍ er að koma fram fyrir hönd fatlaðs fólks gagnvart opinberum aðilum í hverskyns hagsmunamálum svo sem varðandi löggjöf, framkvæmd hennar og í dómsmálum er snerta rétt þess. 

  • Hvað eru málefnahópar ÖBÍ?

    Starf málefnahópanna er hryggjarstykkið í málefnavinnu bandalagsins og gerir það mögulegt að berjast á mörgum stöðum á sama tíma. Málefnahópar bandalagsins fjalla um kjaramál, heilbrigðismál, aðgengismál, atvinnu- og menntamál, sjálfstætt líf og málefni barna.