Ragnar Þór Ingólfsson, formaður VR, gagnrýnir harðlega sveltistefnu stjórnvalda gagnvart örorkulífeyrisþegum. Ragnar Þór birtir stutta grein á Facebook þar sem hann fer yfir greiðslur örorkubóta og desemberuppbót, sem er smánarleg og margfalt minni en því sem launahæstu embættismönnum eru gefnar. Grein Ragnars Þórs fer hér á eftir.
Ég fékk rétt í þessu sent yfirlit yfir greiðslur örorkubóta frá Tryggingastofnun. Þar kemur fram að desemberuppbót er kr.43.103 eða kr.27.180 eftir skatt.
Í heildina fékk viðkomandi greiddar heilar 230.636 kr. fyrir útgjöldum heimilisins og komandi jólahátíð, eftir að hafa greitt 49.639 kr. í skatt.
Það er ekki mikill hátíðarbragur yfir kjörum öryrkja og ellilífeyrisþega svo mikið er víst.
Svo er það sama uppá teningnum hjá stjórnvöldum sem fá 181.050 kr. í jólakjararáðsbónus (orlofsuppbót innifalin, ef rétt reynist).
Við hljótum að geta gert betur við þá sem höllustum fæti standa í okkar samfélagi. Ég hreinlega skammast mín fyrir að vera hluti af samfélagi sem kemur svona fram við okkar veikustu bræður og systur.
Ég skora á stjórnvöld að gera betur. Ég skora á Alþingi, ef einhver vottur er af sjálfsvirðingu eftir, að skattleggja ekki fátækt. Allavega ekki í desember. Í það minnsta að taka ykkur ekki meira en þið eruð tilbúin að skammta öðrum.
