Fréttir

Þingsályktunartillaga um lögfestingu samnings Sameinuðu þjóðanna um réttindi fatlaðs fólks samþykkt á Alþingi. Í dag, 3. júní 2019, samþykkti Alþingi þingsályktunartillögu 16 þingmanna sem lögðu til að ríkisstjórninni yrði falið að undirbúa lögfestingu samnings Sameinuðu þjóðanna um réttindi fatlaðs fólks og að frumvarp um slíkt skuli lagt fyrir Alþingi eigi síðar en 13. desember 2020. ÖBÍ fagnar þessum tímamótum.

Öryrkjabandalag Íslands auglýsir eftir fjölmiðlafulltrúa með brennandi áhuga á mannréttindum og öflugum lögfræðingi í tímabundið starf.

„Í 10 ár hefur íslenska ríkið brotið á lagalegum réttindum yfir 1000 öryrkja með því að skerða bætur þeirra. Í júní 2018 skilaði umboðsmaður Alþingis áliti þess efnis að þessi skerðing sé ólögmæt og greiða eigi öryrkjum þá skerðingu sem þeir hafa orðið fyrir í yfir 10 ár. Nú um ári seinna hafa öryrkjar ekki enn fengið neina endurgreiðslu á þessum ólögmætu skerðingum.“

Fjölmennum á opinn fund 29. maí nk. á Hilton Reykjavík Nordica frá kl. 9-14. Varaformaður ÖBÍ, Halldór Sævar Guðbergsson verður í pallborði. „Íbúðalánasjóður og Félagsmálaráðuneytið boða til opins fundar á Hilton Reykjavík Nordica miðvikudaginn 29. maí. Tilgangur fundarins er að kalla eftir opinni umræðu um hvernig breytingar á húsaleigulögum geti best tryggt öryggi á leigumarkaði.“

„Við eigum að ráðast á orsakir örorku en ekki á afleiðingarnar,“ segir Þuríður Harpa Sigurðardóttir, formaður Öryrkjabandalags Íslands. Á vegum bandalagsins var fyrir helgina haldið málþingið Allskonar störf fyrir allskonar fólk þar sem rætt var um stöðu og möguleika fatlaðs fólks á vinnumarkaði. Stjórnvöld vinna nú að breytingum á framfærslukerfi almannatrygginga þar sem að leiðarljósi er haft að taka upp mat á starfsgetu í stað örorku.

ÖBÍ hefur gert áframhaldandi samkomulag við Opna háskólann í Háskólann í Reykjavík vegna námslínunnar Stjórnendur í þriðja geiranum. Samkomulagið felur það í sér að aðildarfélög ÖBÍ fá 10% afslátt af verði námsins. Aðildarfélög ÖBÍ falla vel innan þriðja geirans því með honum er átt við félög sem starfa í almannaþágu.

Alexander Magnússon og Haukur Hákon Loftsson voru fengnir til að taka þátt í samstarfsverkefni ÖBÍ og Strætó bs. til að kanna möguleika fatlaðs fólks til að nota almenningssamgöngur. Nú hafa þeir skilað af sér niðurstöðum sem gefa til kynna að strætó geti verið raunhæfur ferðamáti fyrir fatlað fólk. Það megi þó bæta strætisvagnana, sérstaklega varðandi festingar, en aðgengi á biðstöðvum er víða óviðunandi.

Mikilvægi mannréttindasamninga erum við öll sammála um enda vita flestir að slíkir samningar eru nauðsynlegir t.d. minnihlutahópum í baráttu fyrir mannréttindum. Samingur Sameinuðu þjóðanna um réttindi fatlaðs fólks (SRFF) var settur þegar alþjóðasamfélagið þ.m.t. Ísland viðurkenndi að fatlað fólk naut ekki réttar til jafns við aðra og fyrirliggjandi alþjóðasamningar reyndust ekki nægilegir til að vernda rétt fatlaðs fólks. Samningurinn hefur því það yfirlýsta markmið að tryggja fötluðu fólki full mannréttindi og grundvallarfrelsi þess til jafns við aðra en ljóst er að fatlað fólk nýtur ekki jafnra réttinda hér á landi til jafns við aðra þegna.