Stjórnvöld innleiði samning SÞ um réttindi fatlaðs fólks

Ellen Calmon
Ellen Calmon

Ellen Calmon formaður ÖBÍ skrifar grein sem birtist á visir.is í dag, um mikilvægi þess að innleiða samning Sameinuðu þjóðanna um réttindi fatlaðs fólks.

Í greininni er sagt frá því að undirskriftasöfnun stendur nú yfir á vef Öryrkjabandalags Íslands þar sem skorað er á stjórnvöld að innleiða samning Sameinuðu þjóðanna (SÞ) um réttindi fatlaðs fólks. Ísland tók þátt í undirritun samningsins árið 2007 en hefur ekki enn staðfest samninginn. 

151 land hafa innleitt samninginn, Ísland er ekki eitt af þeim

Einnig er gert grein fyrir því að 151 land hafi innleitt samninginn. Fjögur Evrópulönd eiga eftir að innleiða hann, Ísland, Finnland, Írland og Holland. Samningurinn er leiðarvísir að því hvernig tryggja skal fötluðu fólki mannréttindi og tækifæri til jafns við aðra í lífinu. 

Lögfesting er afar mikilvæg, annars getur fatlað fólk ekki sótt rétt sinn fyrir dómstólum

Ellen Calmon, formaður ÖBÍ, getur þess að fyrrverandi ráðherra innanríkismála, Hanna Birna Kristjánsdóttir, hafi síðastliðið haust sagt að hún ætlaði að leggja fram frumvarp á vorþingi 2015 um lögfestingu samningsins. „Lögfesting felur í sér frekari réttarvernd einstaklinga en innleiðing getur falið í sér lögfestingu. Það að samningurinn hafi hvorki verið lögfestur né innleiddur þýðir að erfiðara verður fyrir fólk að sækja rétt sinn til dómstóla á grundvelli samningsins.“

Ellen segir innleiðingarferli, sem innanríkisráðuneytið hefur umsjón með, hafið. Nú vonist hún til að samningurinn verði lögfestur sem fyrst.