Skorað á stjórnvöld að fullgilda viðauka við SRFF

Barattutakn.jpg
Barattutakn.jpg

Þann 20. september 2016 samþykkti Alþingi svohljóðandi þingsályktun:

Alþingi ályktar að heimila ríkisstjórninni fyrir Íslands hönd að fullgilda samning Sam­einuðu þjóðanna um réttindi fatlaðs fólks, sem undirritaður var af hálfu Íslands 30. mars 2007. Þá ályktar Alþingi að valkvæður viðauki við samninginn skuli einnig fullgiltur fyrir árslok 2017.

Í greinargerð með þingsályktuninni segir um fullgildingu viðaukans:

Lagt er til að auk samningsins verði viðauki hans einnig fullgiltur. Viðaukinn felur í sér mikilvægar réttarbætur fyrir fatlað fólk, annars vegar kvörtunarleið fyrir einstaklinga til nefndar á vegum Sameinuðu þjóðanna um réttindi fatlaðs fólks og hins vegar leið fyrir nefnd­ina til að rannsaka alvarleg eða kerfisbundin brot gegn samningnum, með samþykki viðkom­andi aðildarríkis.

Íslensk stjórnvöld und­ir­rit­uðu val­frjálsa viðaukann við samn­ing Sam­ein­uðu þjóð­anna um rétt­indi fatl­aðs fólks um leið og þau und­ir­rit­uðu samn­ing­inn sjálfan árið 2007. Val­frjálsa bók­unin mælir fyrir um kæru­leið fyrir ein­stak­linga og hópa sem telja að íslensk stjórn­völd hafi ekki veitt þeim þann rétt sem þeim ber sam­kvæmt samn­ingnum og hafa árang­urs­laust nýtt þau úrræði sem þeir hafa sam­kvæmt íslenskum lögum og stjórn­kerfi til að ná því fram sem þeir telja sig eiga rétt á sam­kvæmt samn­ingn­um. Eft­ir­lit­nefndin getur óskað upp­lýs­inga frá ríkjum og beint til­mælum til þeirra. Með því að full­gilda val­frjálsu bók­un­ina verður virkara aðhald með ríkjum um að fram­fylgja samn­ingn­um, réttar­ör­yggi fatl­aðs fólks meira og mann­rétt­indi þess betur var­in. Þess má geta að yfir 90 ríki hafa nú þegar fullgilt viðaukann.

Nú er árið 2017 rúmlega hálfnað. Við viljum því minna Alþingi, dómsmálaráðherra, utanríkisráðherra og ríkisstjórnina alla á þessa ályktun sem Alþingi samþykkti með öllum greiddum atkvæðum. Við skorum janframt hér með á þessi stjórnvöld að gera það tímanlega sem gera þarf til að staðið verði við ályktunina og mannréttindi fatlaðs fólks fái þar með þá vernd sem viðaukinn veitir.  

Undir áskorunina - sem send var út í byrjun júlí - skrifa:

Ellen Calmon, formaður Öryrkjabandalags Íslands

Bryndís Snæbjörnsdóttir, formaður Landssamtakanna Þroskahjálpar

Freyja Haraldsdóttir, talskona Tabú

Hrannar Jónsson, formaður Geðhjálpar

Margrét Steinarsdóttir, framkvæmdastjóri Mannréttindaskrifstofu Íslands

Rannveig Traustadóttir, forstöðumaður Rannsóknarseturs í fötlunarfræði