Guðrún Hannesdóttir forstöðumaður Starfsþjálfunar fatlaðra,1992.
Guðrún Hannesdóttir, félagsfræðingur og fyrrverandi forstöðumaður Hringsjár, lést fyrr í mánuðinum.
Störf Guðrúnar í þágu fatlaðs fólks á Íslandi eru umfangsmikil og lofsverð. Auk þess að stýra Hringsjá, náms- og starfsendurhæfingu sat hún í ráðherranefnd um starfsendurhæfingu fyrir hönd ÖBÍ og rannsakaði stöðu örorkulífeyristaka á Íslandi.
Má þar til dæmis nefna skýrsluna „Lífskjör og hagir öryrkja: könnun meðal örorku- og endurhæfingarlífeyrisþega“ sem Guðrún skrifaði fyrir ÖBÍ og samtökin hafa nýtt mikið í réttindabaráttu fatlaðs fólks.
Stjórn og starfsfólk ÖBÍ réttindasamtaka kveðja Guðrúnu með einlægu þakklæti og votta vinum og fjölskyldu samúð.
