Frá réttindagöngu 1. maí 2025 © ÖBÍ / Ruth Ásgeirsdóttir
Nýtt lífeyriskerfi almannatrygginga tekur gildi á mánudaginn, 1. september, og þar með verður á fjöldi breytinga sem ÖBÍ réttindasamtök hafa barist lengi fyrir. Má þar einna helst nefna einföldun kerfisins, minni tekjutengingar og greiðari leið til atvinnuþátttöku.
Alma Ýr Ingólfsdóttir, formaður ÖBÍ, sagðist í viðtali við RÚV í vikunni fagna einfölduninni en að tryggja þurfi að möguleikar til atvinnu séu raunverulegir.
„Við höfum kannski mestar áhyggjur af því að það sé ekki nógu vel stutt við bakið á þeim sem koma til með að þurfa að leita að þessu hlutastarfi, að því leyti að það fái kannski ekki nægan stuðning þegar það er komið með vinnu,“ sagði Alma í viðtalinu.
Spurt og svarað
ÖBÍ hafa tekið saman svör við algengum spurningum um nýja kerfið sem nálgast má með því að smella á hlekkinn hér að neðan:
Streymisfundur á mánudag
Félags- og húsnæðismálaráðuneytið með streymisfund um breytingarnar á mánudag klukkan 11.
Inga Sæland félags- og húsnæðismálaráðherra opnar fundinn áður en fulltrúar frá TR, Vinnumálastofnun, VIRK og Heilsugæslu höfuðborgarsvæðisins taka til máls.
og má finna allar upplýsingar um fundinn hér:
Húsnæðisbætur hækka, en ekki nóg
Félags- og húsnæðismálaráðherra ákvað í vikunni að hækka húsnæðisbætur „til að koma í veg fyrir að lífeyrisþegar lendi í því að húsnæðisbætur þeirra skerðist vegna hækkunar“ lífeyrisgreiðslna.
ÖBÍ benti á það í umfjöllun Heimildarinnar að hækkunin nú nemi 0,7% sem samsvarar nokkurn vegin minnstu hækkunum lífeyris með gildistöku nýja kerfisins.
„Fyrir langflesta aðra örorkulífeyristaka hækkar lífeyrir meira en 0,7% og vegur þessi hækkun frítekjumarka ekki til að mæta þeim hækkunum. Því munu húsnæðisbætur langflestra örorkulífeyristaka skerðast við gildistöku breytts örorkulífeyriskerfis,“ sagði í svari ÖBÍ til Heimildarinnar.
