Dr. TA Loeffler, prófessor í útimenntun og afþreyingu við Memorial-háskóla á Nýfundnalandi, hélt fyrirlestur í Mannréttindahúsinu í gær undir yfirskriftinni „Útivist fyrir okkur öll“. Viðburðurinn var samstarfsverkefni ÖBÍ réttindasamtaka og námsbrautar í tómstunda- og félagsmálafræði við Háskóla Íslands og var vel sóttur.
Fyrirlestur Loeffler fjallaði um aðgengilega útivist og hennar reynslu af því að tryggja að öll fái notið útivistar. Sýndi hún sömuleiðis fjölda mynda og myndbanda frá leiðöngrum sínum og þær lausnir sem hún hefur leitað til þess að gera útivist aðgengilega öllum.
Að sögn Loeffler er samvinna lykillinn að því að gera útivist aðgengilega. Fólk þarf að vinna saman að lausnum. Þá er einnig þörf á raunverulegum vilja til þess að skoða hverjar þarfirnar eru og hvaða lausnir virka hverju sinni.
„Varðandi aðgengilega útivist vil ég sérstaklega benda á nokkur atriði. Hvernig komumst við þangað sem við viljum? Eru aðgengilegir hjóla- eða göngustígar? Í öðru lagi, þegar við komum á áfangastað, hvernig er yfirborðið og möguleikinn á að nota hjálpartæki? Í þríðja lagi, hvernig miðlum við upplýsingum? Notum við fjölbreyttar leiðir? Erum við með skilti á blindraletri eða með QR kóða eða sem tala upphátt? Þannig hlutir gera útivist aðgengilega í víðum skilningi.“
