Lögfræðingar og ráðgjafar ÖBÍ veita fötluðu fólki gjaldfrjálsa ráðgjöf. Boðið er upp á símaráðgjöf á fimmtudögum, bókuð viðtöl og svör við erindum sem berast á radgjof@obi.is.

Ástæðurnar að baki málunum í grunninn eru þær sömu og fyrri ár: Réttindi fólks til framfærslu eru brotin sem og önnur mannréttindi eða þá ekki virt af stjórnsýslunni í heild: ríki, sveitarfélögum og stofnunum.

Í apríl 2024 voru samþykktar á Alþingi breytingar á bæði greiðslu- og matskerfi fyrir örorku, sem tóku gildi 1. september 2025 ásamt nýjum sjúkra- og endurhæfingargreiðslum í stað endurhæfingarlífeyris. Fjölmargir hafa haft samband við ráðgjafa ÖBÍ með spurningar er tengjast breyttu örorkukerfi og ráðgjafar ÖBÍ hafa aflað upplýsinga um ýmis atriði varðandi breytingarnar og komið þeim á framfæri. Ábendingarnar snúa nær allar að breytingum á matskerfinu og afgreiðslu umsókna. Með sjúkra- og endurhæfingargreiðslum kom inn sú jákvæða breyting að umsækjendur sem ekki bíða eftir meðferð eða endurhæfingu og/eða geta ekki sinnt endurhæfingu vegna heilsubrests geta fengið sjúkragreiðslur. Mikil áhersla er lögð á sjúkra- og endurhæfingargreiðslur og að lengja það tímabil sem þær eru greiddar áður en kemur að mati á örorku.

Helsti vandinn hefur verið langur afgreiðslutími, synjanir, skortur á viðeigandi endurhæfingu og óljósar forsendur ákvarðana. Sérstaklega komu upp mál þar sem fötluðum nemendum var synjað um greiðslur vegna námsálags og mál fólks með örorkumat frá fyrra búsetulandi. Í öðru tveggja kærumála af síðarnefnda taginu var ákvörðun Tryggingastofnunar felld úr gildi.

Óvissa skapaðist um samspil greiðslna frá Tryggingastofnun og lífeyrissjóðum. Bráðabirgðaákvæði sem á að koma í veg fyrir neikvæða víxlverkun kerfanna var framlengt til 31. desember 2026, en áhrifin á fólk sem fær greiðslur úr báðum kerfum eru enn ekki að fullu ljós.

Hærri greiðslur frá almannatryggingum leiddu í sumum tilvikum til lægri stuðnings annars staðar, einkum sérstaks húsnæðisstuðnings, þar sem tekjuviðmið sveitarfélaga fylgdu ekki breytingunum.

Ráðgjafar sinntu einnig mörgum málum um húsnæðisleysi, bið eftir búsetuúrræðum, NPA, hjálpartæki, heima- og stuðningsþjónustu, heimahjúkrun, akstursþjónustu og stuðning við fötluð börn í skólum. Fólk á húsnæðisbiðlistum fékk oft ekki upplýsingar um stöðu sína þrátt fyrir skyldu sveitarfélaga til upplýsingagjafar.

Eftir lögfestingu samningsins leitaði fólk einnig skýringa á áhrifum hans. Ráðgjafar áttu reglulegt samtal við réttindagæslu fatlaðs fólks hjá Mannréttindastofnun Íslands og miðluðu reynslu af stöðu réttinda.

Þekking tengd þátttöku ráðgjafa í samstarfshópum, meðal annars um réttindi barna, innflytjendur, fatlaða fanga, máltækni og leiðir út úr afbrotum, nýttist beint í ráðgjöfinni.

ÖBÍ veitir árlega styrki til náms, verkefna og aðildarfélaga sem styðja við réttindabaráttu, þekkingu, atvinnu og þátttöku fatlaðs fólks.

Námsstyrkir sem opna leiðir

ÖBÍ veitir fötluðu fólki námsstyrki með það að markmiði að styðja örorkulífeyristaka og fólk á sjúkra- og endurhæfingargreiðslum til formlegs náms sem getur aukið möguleika til atvinnu, sjálfstæðis og þátttöku.

Auglýst er eftir umsóknum um námsstyrki á heimasíðu ÖBÍ og á samfélagsmiðlum og fer úthlutun fram að hausti. Er styrkjunum ætlað að koma til móts við námskostnað, svo sem skráningar- og þátttökugjöld. Aðeins er styrkt til eins námskeiðs, annar eða námsárs í senn. Umsækjendum er frjálst að sækja um oftar en einu sinni haldi þeir námi áfram, að því tilskyldu að um framvindu sé að ræða. Styrkupphæðir eru ákvarðaðar í hvert sinn í samræmi við umsóknir og fjárheimildir.

Verkefnastyrkir sem efla baráttuna

ÖBÍ réttindasamtök veita árlega styrki í verkefni sem tengjast hagsmunum fatlaðs fólks og eru í samræmi við markmið og stefnu samtakanna. ÖBÍ úthlutaði 57 milljónum króna í styrki til samtals 55 verkefna á starfsárinu. Alls sóttu 86 um verkefnastyrk og var því meiri en helmingur umsækjenda styrktur.

Öflugri aðildarfélög

ÖBÍ veitir aðildarfélögum sínum rekstrarstyrki árlega að uppfylltum ákveðnum skilyrðum. Styrkirnir eru ætlaðir til stuðnings við reglulega starfsemi og rekstur félaganna. Alls sóttu 30 félög um styrki árið 2026 og nam heildarúthlutun um 163 milljónum króna.

Vinnustaðurinn ÖBÍ

Öflugt fólk í innra og ytra starfi ÖBÍ er lykillinn að árangri og er markvisst unnið að því að viðhalda kraftmiklu og faglegu samfélagi innan samtakanna. Skrifstofa ÖBÍ er vel skipuð og liðsheildin sterk. Umfang starfsemi ÖBÍ hefur vaxið á undanförnum árum, þó hefur stöðugildum ekki fjölgað í raun. Með sterkri liðsheild, skýru verklagi og sameiginlegri sýn hefur skapast mikilvægur grunnur fyrir réttindabaráttuna, þjónustu við aðildarfélögin og áframhaldandi uppbyggingu ÖBÍ sem leiðandi mannréttindasamtaka á Íslandi.

Mannauðsstefna ÖBÍ styður við gott vinnuumhverfi þar sem virðing, jafnrétti og góð samskipti eru í forgrunni. Reglulegir starfsmannafundir, starfsmannasamtöl, fræðsla og samtal um verkefni og forgangsröðun styrkja liðsheildina og bæta verklag. Þá hafa verið teknar í notkun valdar gervigreindarlausnir til að auðvelda og auka gæði vinnu og hefur verið sett sérstök stefna um notkun þeirra.

Aðalfundur

Aðalfundur ÖBÍ var haldinn 3. og 4. október 2025 á Grand Hótel Reykjavík. Alma Ýr Ingólfsdóttir var endurkjörin formaður og þrjú ný aðildarfélög, Átak, HD samtökin og PCOS samtök Íslands, bættust í hópinn. Aðildarfélög ÖBÍ urðu þar með 43 talsins og hafa aldrei verið fleiri.

Fundurinn lagði meðal annars áherslu á innleiðingu samningsins, kjaramál, húsnæði og ábyrgð stjórnvalda á réttindum fatlaðs fólks.

Formannafundir

Tveir formannafundir voru haldnir á tímabilinu, í september 2025 og janúar 2026. Formannafundir eru vettvangur aðildarfélaga til samráðs, stefnumótunar og upplýsinga. Fundur septembermánaðar snerist einkum um EKKO-fræðslu og fræðslustarf ÖBÍ og í janúar voru meðal annars kosningar og innleiðing SRFF til umræðu.

Aðildin endurskoðuð

Vinnuhópur sem stjórn ÖBÍ skipaði eftir aðalfund 2024 vann tillögur að endurskoðun aðildarákvæða laga ÖBÍ. Aðildarfélög tóku þátt í vinnustofum 25. október 2025 og á stefnuþingi 17. apríl 2026 þar sem fengnar voru skoðanir aðildarfélaga á breytingum á formi aðildar. Að stefnuþingi loknu fól stjórn laganefnd að móta tillögur fyrir næsta aðalfund.

ÖBÍ rekur öflugt fræðslustarf með það að markmiði að styrkja faglegt starf og réttindabaráttuna í heild. Á starfsárinu var fræðslustarfið fjölbreytt og var áherslan á hagnýta þekkingu sem styður aðildarfélögin í daglegu starfi, eflir málefnastarf þeirra og styrkir fólk til þátttöku í réttindabaráttu fatlaðs fólks.

Helstu stoðir fræðslustarfsins voru Fræðsluröð ÖBÍ, Námsstefna ÖBÍ, viðburðir tengdir málefnahópum og UngÖBÍ, auk Morgunbollans og annarra viðburða í Mannréttindahúsinu.

Námsstefna ÖBÍ – 23. og 30. október

Námsstefna ÖBÍ var haldin í kjölfar aðalfundar eins og fyrri ár. Hún er lykilviðburður í fræðslustarfi samtakanna og er ætlað að ýta undir valdeflingu og þátttöku. Hana sækja fulltrúar í innra og ytra starfi ÖBÍ, fulltrúar í stjórn, varastjórn, málefnahópum, nefndum og ráðum, nýir forsvarsmenn aðildarfélaga og starfsfólk.

Námsstefnan fór fram yfir tvö síðdegi og var áhersla lögð á að stilla saman strengi fyrir vetrarstarfið. Fyrri dagurinn, Nýliðadagurinn, var sérstaklega ætlaður nýliðum þar sem farið var yfir stefnu, hlutverk og starfsemi ÖBÍ, siða- og EKKO-reglur og fleira. Á seinni deginum var meðal annars fjallað um SRFF, gervigreind, hagsmunagæslu, samskipti og liðsheild, auk þess var nokkuð um borðavinnu.

Erlent samstarf hefur tvíþætt gildi. Það styrkir hagsmunagæslu hér heima með alþjóðlegum samanburði og veitir íslenskri hreyfingu tækifæri til að hafa áhrif á alþjóðlega stefnumótun.

Erlent samstarf birtist með ýmsum hætti á starfsárinu. Í september 2025 kynntu ÖBÍ, Þroskahjálp, Geðhjálp og Umhyggja áherslur fyrir sérfræðinefnd Sameinuðu þjóðanna og bentu á verulega annmarka á því hvernig mannréttindi fatlaðs fólks eru tryggð hér á landi. Sú vinna tengdist beint eftirfylgni SRFF og mikilvægi alþjóðlegra mannréttindaskuldbindinga.

ÖBÍ tekur þátt í Rådet för nordiskt samarbete om funktionshinder (RNSF), sem er ráðgefandi og stefnumarkandi ráð varðandi málefni fatlaðs fólks fyrir Norrænu ráðherranefndina og samstarfsaðila hennar. Í ráðinu sitja fulltrúar fötlunarsamtaka frá öllum Norðurlöndunum ásamt starfsfólki ráðuneyta. Fundirnir eru haldnir tvisvar sinnum á ári og er ætlað að upplýsa hvað ber hæst í hverju landi og sótti formaður ÖBÍ fundi bæði í Svíþjóð og í Danmörku síðasta árið.

Þá tekur ÖBÍ þátt í fundum heildarsamtaka fatlaðs fólks á Norðurlöndum, Handikapporganisationernas nordiska råd (HNR) sem haldnir eru tvisvar sinnum ári. Tíðkast hefur að halda fyrri fundinn í aðdraganda eða kjölfar fundar RNSF og seinni fundurinn er rafrænn. Fundirnir eru bæði upplýsandi og gefandi og gott að geta speglað þau mál sem ÖBÍ vinnur að hverju sinni. Þá er mikilvægt að tengjast fólki og félögum sem vinna að sömu hagsmunum.

Þá sendu samtökin umsagnir um þátttöku Íslands í samstarfsáætlunum Evrópusambandsins 2028-2034 og fjölluðu um alþjóðleg mannúðar- og mannréttindamál, meðal annars stöðu fatlaðra barna á Gaza.

Formaður ÖBÍ og formaður UngÖBÍ var hluti af sendinefnd Íslands á aðildarríkjaþinginu um samning Sameinuðu þjóðanna um réttindi fatlaðs fólks sem haldið var í New York í júní og flutti Ragnar Þór Ingólfsson félags- og húsnæðismálaráðherra ávarp Íslands á þinginu.

Í sendinefndinni voru að auki Hreiðar Ingi Eðvarðsson, aðstoðarmaður ráðherra og Guðmundur Ármann Pétursson, formaður Þroskahjálpar.

Fjárhagur ÖBÍ réttindasamtaka var áfram sterkur á árinu 2025 og gekk reksturinn vel. Samtökin hafa lagt áherslu á ábyrga fjármálastjórn, hagkvæmni í rekstri og skýra forgangsröðun fjármuna í þágu fatlaðs fólks. Á sama tíma hefur starfsemi ÖBÍ vaxið og verkefnum fjölgað, meðal annars vegna aukins samráðs, öflugrar hagsmunagæslu, fjölbreytts fræðslu- og viðburðahalds, áherslu á samstarfsverkefni og aukins stuðnings við aðildarfélög.

Samkvæmt ársreikningi ÖBÍ fyrir árið 2025 var rekstrarafkoma ársins jákvæð um 246 milljónir króna. Heildareignir samtakanna námu 1.969 milljónum króna í árslok og eigið fé var 1.736 milljónir króna. Eiginfjárstaðan er því traust, skuldahlutfall lágt og lausafjárstaðan góð. Þessi staða veitir ÖBÍ mikilvægt svigrúm til að takast á við óvæntar aðstæður.

Góð fjárhagsstaða er mikilvæg forsenda þess að ÖBÍ geti sinnt hlutverki sínu af krafti, brugðist við nýjum áskorunum og stutt við réttindabaráttu, þjónustuþróun og samstarfsverkefni til framtíðar.

Tekjur ÖBÍ komu sem fyrr að langstærstum hluta frá Íslenskri getspá, en samtökin eiga 40% hlut í fyrirtækinu. Framlög frá Íslenskri getspá námu 1.373 milljónum króna á árinu 2025 og jukust milli ára. Vegna eðlis starfseminnar fylgir ákveðin óvissa tekjuflæðinu og er farið varlega í fjárhagsáætlanagerð.

Á árinu veitti ÖBÍ, auk eigin fyrirtækja og aðildarfélaga, fjölmörgum samtökum, verkefnum og einstaklingum styrki að fjárhæð alls 753 milljónum króna.

Fjármunirnir runnu meðal annars til húsnæðis- og þjónustulausna, rannsókna, réttindabaráttu, náms, velferðar og verkefna sem stuðla að aukinni þátttöku og bættri stöðu fatlaðs fólks. Þá lagði ÖBÍ fram 140 milljónir króna í stofnfé til Hringsjár endurhæfingar og lagði í Skjöld, samstarfsverkefni ÖBÍ, Brynju leigufélags og Hringsjár, rúmlega 196 milljónir króna til kaupa á íbúðum fyrir notendur Hringsjár. Var það gert í í formi framlaga til Brynju leigufélags.

Aðrar tekjur ÖBÍ komu í gegnum samstarfsverkefni og leigutekjur af Sigtúni 42. Leigutekjur námu um 31 milljón króna á árinu og hafa hækkað í takt við vísitölu neysluverðs.

Í byrjun árs 2026 festi ÖBÍ kaup á hlut Brúar lífeyrissjóðs í Sigtúni 42 fyrir 310 milljónir króna og eignaðist þar með alla fasteignina. Gerðar voru nauðsynlegar breytingar á húsnæðinu og það tekið í notkun 1. júlí 2026. Þá hófust á vormánuðum framkvæmdir vegna nýs sorps- og hjólaskýlis. Á seinni hluta ársins 2025 var unnið að endurbótum í Sigtúni 42, meðal annars í kjallara hússins, viðgerðum eftir vatnstjón og frekari eflingu brunavarna.

Góð eiginfjár- og lausafjárstaða, traustur varasjóður og jákvæð rekstrarafkoma skapa grundvöll fyrir áframhaldandi öflugt starf í þágu fatlaðs fólks.

Aðgengishópur lagði megináherslu á samgöngur, mannvirki, stæðiskort og leiðbeiningar um algilda hönnun. Hópurinn krafðist meðal annars lausnar vegna rangrar gjaldtöku stæðiskorthafa í sjálfvirku myndavélaeftirliti og óskaði skýrra viðmiða um útgáfu stæðiskorta frá stjórnvöldum.

Viðmið um útgáfu stæðiskorta fyrir hreyfihamlaða virðast ekki vera til en þau eru á ábyrgð embættis landlæknis. Óskað hefur verið eftir skýringum frá embættinu en formlegt erindi hefur einnig verið sent heilbrigðisráðuneytinu sem er með málið í skoðun auk þess sem þingmaður mun leggja fram fyrirspurn á Alþingi.

Almenningssamgöngur eiga að vera fyrir alla en oft eru farartæki og biðstöðvar því miður óaðgengileg. Sérstaklega var þrýst á úrbætur á flugrútunni og aðstöðu tengdri henni. Nú hafa tvær flugrútur með hjólastólaaðgengi verið teknar í notkun, sem er mikilvægt framfaraskref.

Leiðbeiningar um leiðarlínur og athyglissvæði voru unnar með Blindrafélaginu og óskað var eftir að þær yrðu felldar inn í byggingarreglugerð.

Hópurinn ráðlagði meðal annars Listahátíð í Reykjavík, Hinsegin dögum og Hörpu um aðgengi að viðburðum.

Stefnt er að því að halda tvö málþing með haustinu, annars vegar um húsnæðismál og aðgengi að eldra húsnæði með húsnæðishópi ÖBÍ og hins vegar um aðgengi að nýbyggingum. Mótun dagskrár stendur yfir.

Hópurinn tekur þátt í fræðilegri rannsókn sem styrkt er af Aski – mannvirkjarannsóknasjóði um mat á innleiðingu algildrar hönnunar í nýbyggðum fjölbýlishúsum. Gert er ráð fyrir að niðurstöður rannsóknarinnar verði kynntar á árinu.

Formaður: Jón Gunnar Benjamínsson.
Starfsmaður: Stefán Vilbergsson.

Atvinnu- og menntahópur ÖBÍ fjallaði einkum um áhrif breytinga á almannatryggingakerfinu á atvinnuþátttöku, meðal annars starfsgetumat og frítekjumörk. Hópurinn lagði áherslu á að kerfið hvetji til atvinnuþátttöku án þess að fólk óttist að missa réttindi eða fjárhagslegt öryggi. Einnig var rætt um þörf fyrir fjölbreyttari hlutastörf og raunveruleg tækifæri til að nýta menntun, reynslu og hæfni.

Hópurinn fylgdist með verkefni Unndísar og veitti umsagnir um fræðsluefni þess. Á menntasviðinu var lögð áhersla á að skortur á aðgengi, stuðningi og viðeigandi aðlögun takmarki enn námsval fatlaðs fólks, sérstaklega þeirra sem hafa miklar stuðningsþarfir. Hópurinn vann jafnframt að undirbúningi málþings um stöðu framhaldsskólanema þegar þeir verða 18 ára og mikilvægi samfellu í þjónustu og stuðningi.

Formaður hópsins skrifaði greinar um atvinnu- og menntamál, hélt erindi um áhrif langvinnra veikinda kvenna á atvinnuþátttöku og tók þátt í útvarpsviðtali um atvinnuþátttöku og aðgengi að námi. Hópurinn hélt einnig, í samstarfi við kjarahóp ÖBÍ, námskeið um sjálfstæðan atvinnurekstur öryrkja.

Áfram verður lögð áhersla á aukinn sveigjanleika, viðeigandi aðlögun og raunverulegt val fatlaðs fólks til náms og starfa.

Formaður: Hrönn Stefánsdóttir.
Starfsmaður: Sunna Elvira Þorkelsdóttir.

Meðal þeirra mála sem barnamálahópurinn hefur unnið að á starfsárinu eru málefni tengd farsældarlöggjöfinni og framkvæmd hennar, miðlægum gagnagrunni um nemendur í skólakerfinu og fyrirhuguðum breytingum á einkunnakerfi skóla. Hópurinn hefur komið að umsögnum vegna þessara mála og fylgst með umræðu og vinnu á vettvangi Alþingis, meðal annars hjá allsherjar- og menntamálanefnd.

Á starfsárinu var jafnframt unnið með Barna- og fjölskyldustofu að málefnum farsældarlöggjafarinnar og sérstaklega horft til upplifunar foreldra af framkvæmd hennar. Haldinn var fundur með foreldrum þar sem reynsla þeirra og sjónarmið voru rædd.

Málefnahópurinn tók einnig þátt í verkefninu „Allir með“. Formaður Málefnahóps barna hélt í kjölfarið erindi á fyrsta fræðslukvöldi verkefnisins í Gerplu, Kópavogi.

Fræðslustarf tengt barnabókinni um PóGó hélt jafnframt áfram á starfsárinu. Bergrún Íris Sævarsdóttir, höfundur bókarinnar, hefur kynnt hana í skólum landsins og þannig haldið áfram þeirri vinnu hópsins að auka fræðslu, sýnileika og skilning á málefnum fatlaðra barna innan skólasamfélagsins.

Málefnahópur barna hefur þannig komið að fjölbreyttum verkefnum á starfsárinu, allt frá umsögnum og réttindagæslu til fræðslu og samstarfsverkefna. Reglulegir fundir hópsins hafa skapað vettvang fyrir umræðu um þau fjölmörgu málefni sem varða börn innan ÖBÍ og verður áfram unnið að því að fylgja þeim eftir.

Formaður: Sindri Viborg.
Starfsmaður: Andrea Valgeirsdóttir.

Heilbrigðishópur vann meðal annars að greiðsluþátttöku og aðgengi að heilbrigðisþjónustu, langvinnum veikindum kvenna, heyrnarþjónustu, geðheilbrigði og hjálpartækjum.

Á alþjóðlega geðheilbrigðisdeginum 10. október 2025 flutti formaður hópsins erindi á málþinginu Gulur september og birti grein um geðheilbrigði.

Eftir áramót færðist áherslan yfir á aðgengi að heilbrigðisþjónustunni. Í febrúar hélt heilbrigðishópurinn málþing sem fjallaði um lífskjör og aðgengi að heilbrigðisþjónustunni. Þar voru kynntar niðurstöður rannsóknar á stöðu fatlaðs fólks innan greiðsluþátttökukerfisins og var niðurstaðan að fatlað fólk og öryrkjar þurfa að greiða meir fyrir heilbrigðisþjónustu en aðrir og fresta í meira mæli að sækja sér heilbrigðisþjónustu m.a. vegna kostnaðar.

Á alþjóðlegum degi heyrnar vakti ÖBÍ athygli á heyrnarskertum börnum og styrkti kaup á fyrsta heyrnarskimunartæki Heyrnar- og talmeinastöðvar Íslands.

Í mars vakti hópurinn athygli á aðgengi að leghálsskimunum fyrir hreyfihamlaðar konur og hélt vel sótt málþing með Siðfræðistofnun Háskóla Íslands um langvinn veikindi kvenna.

Hópurinn kallaði eftir þjónustu- og þekkingarmiðstöð um einhverfu og ályktaði um hækkandi heilbrigðiskostnað öryrkja og ójöfnuð í þjónustu.

Í júní leiddi Heilbrigðishópurinn samstarf við Læknafélag Íslands, Lyfjafræðingafélag Íslands og tvo geðlækna þar sem breytingar á greiðsluþátttöku lyfja var mótmælt með bréfi til heilbrigðisráðuneytisins.

Auk þess skrifaði hópurinn greinar og umsagnir og átti samráð við notendaráð um hjálpartækjalöggjöf.

Formaður: Telma Sigtryggsdóttir.
Starfsmaður: Gunnar Alexander Ólafsson.

Málefnahópur um húsnæðismál vann að rannsóknum, réttindabaráttu og upplýsingamiðlun á starfsárinu og fékk til sín nokkra gesti, bæði frá óháðum félagasamtökum og háskólasamfélaginu með það að markmiði að byggja brýr svo gagnaöflun haldist sem best. Í lok seinasta starfsárs samþykkti hópurinn að kanna grundvöll og undirbúa framkvæmd á nýrri rannsókn um húsnæðismál fatlaðs fólks. Fyrri rannsókn hópsins var gefin út árið 2022 og mikilvægt að safna saman nýjum upplýsingum um stöðuna í dag til samanburðar.

ÖBÍ og Félagsvísindastofnun Háskóla Íslands gerðu verksamning um rannsóknina í desember 2025. Hún á að uppfæra samanburðarhæf gögn frá 2022 og skoða sérstaklega stöðu heimilislauss fatlaðs fólks. Niðurstöður eru væntanlegar um næstu áramót.

Hópurinn tók einnig þátt í EXIT, samráðsvettvangi um leiðir út úr afbrotum, með áherslu á húsnæði og endurhæfingu fatlaðs fólks sem snýr aftur út í samfélagið eftir afplánun.

Hópurinn vann jafnframt að málum tengdum aðlögunar- og aðgengissjóði og undirbjó málþing um húsnæði og aðgengi.

Formaður: María Pétursdóttir.
Starfsmaður: Kjartan Þór Ingason.

Kjarahópurinn í samvinnu við EAPN (European Anti Poverty Network) á Íslandi stóð að viðburði tengdum alþjóðlegum baráttudegi gegn fátækt 17. október undir yfirskriftinni „Upprætum fátækt“. Í framhaldinu var farið yfir skilaboð frá fólkinu sem kom á viðburðinn, þau tekin saman og afhent fulltrúum ráðuneytanna. Örsögur sem kjarahópurinn og EAPN höfðu tekið saman voru lesnar upp á viðburðinum auk þess sem hægt var að hlusta á upplestur þeirra í Fátæktargildrunni, gjörningi á vegum ÖBÍ í Smáralind í október. Að auki skrifuðu meðlimir kjarahópsins greinar í tilefni dagsins.

Hópurinn hóf einnig hugmyndavinnu að hlaðvarpsþáttum í samstarfi við EAPN og var fyrsti þátturinn tekinn upp 9. apríl. Þrír fyrstu þættirnir voru sendir út sumarið 2026.

Kjarahópurinn stóð fyrir námskeiði 12. febrúar í samstarfi við málefnahóp um atvinnu- og menntamál námskeiðið: „Hvernig geta öryrkjar verið sjálfstætt starfandi? Námskeið um eigin rekstur, skil á gjöldum og framtalsgerð.“ Námskeiðið sem var haldið í annað sinn var mjög vel sótt og almenn ánægja með það.

Kjarahópurinn tók þátt í undirbúningi fyrir þátttöku ÖBÍ í 1. maí göngunni eins og fyrri ár. Yfirskrift forgönguborðans árið 2026 var „Tækifæri á vinnumarkaði-já takk“ og auk þess var gengið með fjölda kröfuspjalda með mismunandi slagorðum. Einnig var gjörningur vegna sveitarstjórnarkosninganna, Biðlistinn, til að vekja athygli á löngum biðlistum innan kerfisins. Vakti þessi gjörningur verðskuldaða athygli.

Kjarahópurinn ræddi þau frumvörp sem tengjast kjaramálum sem voru til umsagnar á Alþingi, þar á meðal fjárlagafrumvarp 2026. Eins tóku formaður og varaformaður þátt í verkefninu „Vinnustofa um fátækt barna“ á vegum stýrihóps sem stýrt var af Kolbrúnu Áslaugar Baldursdóttur þingmanni.

Önnur mál kjarahópsins voru að hefja vinnu við gátlista um hvernig og hvert fólk getur leitað þegar það verður fyrir veikindum eða slysum. Nemi í félagsráðgjöf sem var í starfsþjálfun tók það verkefni upp á sína arma. Eins vann hópurinn samantekt um mýtur varðandi öryrkja.

Formaður: Geirdís Hanna Kristjánsdóttir.
Starfsmaður: Sigríður Hanna Ingólfsdóttir.

UngÖBÍ stóð fyrir tveimur viðburðum á starfsárinu og skilaði umsögn um ungmennastefnu með tillögum að inngildingu ungs fatlaðs fólks. Aðgengisviðurkenningin Fjólublátt ljós við barinn var veitt í annað sinn í október. Viðurkenninguna hlýtur sá bar eða skemmtistaður sem hugar að aðgengismálum fyrir gesti sína. Í þetta sinn hlaut Einstök bar viðurkenninguna.

Í nóvember hélt UngÖBÍ námskeið um fyrstu skref á fasteignamarkaði fyrir ungt fatlað fólk. Björn Berg fór yfir ólíkar leiðir og helstu atriði við kaup á fyrstu fasteign.

Í mars bauð UngÖBÍ 20–35 ára fólki í pöbbkviss í Stúdentakjallaranum. Viðburðurinn sameinaði fötluð og ófötluð ungmenni í blönduðum liðum og studdi við félagslega þátttöku.

Í apríl hófst Erasmus samstarfsverkefnið Sports for Everyone. Markmið verkefnisins er að draga úr félagslegri einangrun ungs fatlaðs fólks og stuðla að þátttöku þeirra í samfélaginu í gegnum rafíþróttir. Til að að ná þeim markmiðum verður hannað þjálfunar- og fræðsluefni sem þjálfarar geta notað til að bæta móttöku og aðlögun rafíþróttastarfs fyrir ungt fatlað fólk. Þrír samstarfsaðilar vinna í verkefninu með UngÖBÍ. Þau eru Rafíþróttasamband Íslands, Rafíþróttasamband Finnlands og fræðslu- og inngildingarsamtökin Close in the Distance frá Ítalíu.

Alþjóðleg samvinna spilar mikilvægt hlutverk í starfsemi UngÖBÍ og eflir hreyfinguna með nýjum hugmyndum, samstarfsaðilum og stærri verkefnum. Starfsmaður UngÖBÍ sótti tvo tengslamyndunarviðburði á tímabilinu í boði Borgarasjóðs EES í Búdapest og Sofíu. Varaformaður UngÖBÍ sótti Esports Sustainability Summit í Espoo þar sem meðal annars var lögð áhersla á aðgengismál.

Þá sótti formaður fimm viðburði og hélt erindi fyrir hönd UngÖBÍ. Þeir viðburðir voru fundur velferðarnefndar Norðurlandaráðs, Nordic Youth Disability Summit og Norræna fötlunarráðsins í Stokkhólmi, Nordic Baltic Youth Summit í Helsinki, skipulagning vinnustofu á Nordic Youth Seminar í Kungalv í samstarfi við systurhreyfingar okkar á Norðurlöndum. Einnig Nordic Youth Disability Summit og fundur fötlunarráðsins í Musholm. Að lokum sótti formaður 19. þing aðildarríkja samnings Sameinuðu þjóðanna um réttindi fatlaðs fólks í New York þar sem hann tók þátt í pallborði á norrænum hliðarviðburði.

Formaður: Eiður Welding.
Starfsmaður: Kjartan Þór Ingason.