Réttindi fatlaðs fólks eftir 67 ára aldur voru meðal umræðuefna á formannafundi ÖBÍ réttindasamtaka sem haldinn var í Mannréttindahúsinu þriðjudaginn 8. september. Á fundinum var einnig fjallað um starf málefnahópa ÖBÍ, fjárlagafrumvarp næsta árs og valfrjálsa bókun við samning Sameinuðu þjóðanna um réttindi fatlaðs fólks.
Alma Ýr Ingólfsdóttir, formaður ÖBÍ, setti fundinn og fór yfir hlutverk málefnahópa samtakanna. Hún lagði áherslu á virka þátttöku fulltrúa aðildarfélaganna og reglulega upplýsingamiðlun milli félaganna og hópanna. Málefnahóparnir eru sex og gegna lykilhlutverki í hagsmunastarfi ÖBÍ, meðal annars með því að móta tillögur í réttindamálum og veita stjórnvöldum aðhald.
Gunnar Alexander Ólafsson, hagfræðingur ÖBÍ, fór yfir helstu atriði fjárlagafrumvarps fyrir árið 2027 sem snerta fatlað fólk. Þar var meðal annars fjallað um lífeyrisgreiðslur, framlög til heilbrigðisþjónustu og hjálpartækja, auk fyrirhugaðra breytinga á sköttum og gjöldum.
Ragnar Þór Ingólfsson, félags- og húsnæðismálaráðherra, ávarpaði einnig fundinn.
Sigurður Árnason, lögfræðingur ÖBÍ, kynnti valfrjálsa bókun við samning Sameinuðu þjóðanna um réttindi fatlaðs fólks. Í erindinu fjallaði hann um kæruleið bókunarinnar, skilyrði þess að kvartanir séu teknar til meðferðar og heimild nefndar Sameinuðu þjóðanna til að rannsaka alvarleg og kerfisbundin réttindabrot. Hann fór jafnframt yfir mikilvægi bókunarinnar fyrir réttarvernd fatlaðs fólks og eftirlit með framkvæmd samningsins.
Að loknum erindum tók við borðavinna um stöðu fatlaðs fólks við 67 ára aldur. Þátttakendur ræddu meðal annars hvernig almannatryggingar ættu að taka mið af því að fötlun hverfur ekki við ákveðinn aldur, hvaða hindranir mæta eldra fötluðu fólki og hvernig tryggja megi aðgengi að hjálpartækjum óháð aldri. Einnig var rætt hvernig tryggja megi að rétturinn til sjálfstæðs lífs og sjálfsákvörðunar fylgi fólki alla ævi.
