Þann 1. október 2026 fer fram alþjóðleg ráðstefna í Hörpu í Reykjavík undir yfirskriftinni „WAD: Iceland onboard – from requirements to reality“. Ráðstefnan er haldin af IAAP Nordic í samstarfi við ÖBÍ réttindasamtök og er styrkt af Ský og EBU. Hún fjallar um innleiðingu Evróputilskipunar um stafrænt aðgengi (Web Accessibility Directive) í íslenskri löggjöf og framkvæmd.
Markmið ráðstefnunnar er að tengja saman stefnumótun, framkvæmd og raunverulega notkun stafrænnar þjónustu með aðgengi að leiðarljósi. Á dagskrá verða erindi frá alþjóðlegum sérfræðingum á borð við Lainey Feingold, Susanna Laurin, Joseph Seychell, Mikael Becker, Jakob Rosin og Rósa Maríu Hjörvar, sem fjalla um aðgengismál út frá ólíkum sjónarhornum, þar á meðal stefnumótun, eftirliti og reynslu notenda með fötlun.
Eftir hádegi verður lögð áhersla á hagnýta nálgun þar sem þátttakendur kynnast reynslu notenda í gagnvirkum stöðvum, auk vinnustofa þar sem farið verður yfir hvernig uppfylla megi aðgengiskröfur í mismunandi hlutverkum, svo sem í hönnun, þróun, innkaupum og efnisgerð.
Viðburðurinn er bæði ætlaður sérfræðingum og öllum sem koma að mótun og framkvæmd stafrænnar þjónustu. Hluti dagskrár er opinn öllum þátttakendum og boðið er upp á bæði staðbundna þátttöku í Hörpu og rafræna þátttöku.
