Þegar landsmenn ganga til kosninga þann 14. maí í vor, verður í fyrsta sinn kosið eftir nýjum lögum um kosningar. Undanfarnar kosningar hefur borið á hnökrum í framkvæmd kosninga þegar kemur að aðgengismálum, aðstoð í kjörklefa svo eitthvað sé nefnt. Í nýjum lögum er nokkuð tekið á þessum málum, en ráðherra eftirlátið að útfæra reglur til að mynda um aðstoð í kjörklefa. Sú reglugerð hefur ekki enn verið sett.
Þuríður Harpa Sigurðardóttir hefur sent dómsmálaráðherra bréf vegna þessa, þar sem áhyggjum vegna þessa er komið á framfæri. Bréfið er svo hljóðandi:
Heill og sæll Jón.
Í kosningum til sveitarstjórna í vor, kjósum við í fyrsta sinn eftir nýjum kosningalögum.
Undanfarin ár hafa komið í ljós hnökrar á möguleikum fatlaðs fólks til að nýta kosningarétt sinn. Kjörklefar ætlaðir fólki í hjólastólum hafa verið opnir og leynileg kosning ekki alltaf möguleg. Kjósandi hefur ekki fengið að ráða aðstoð sinni í kjörklefanum og aðgengi að kjörstað sem og kjördeild hefur ekki alltaf verið upp á það besta.
Nú hefur ráðherra tækifæri til að bæta úr þessu. Leiðbeiningar til kjörstjórna og starfsmanna þeirra um framkvæmd aðstoðar við atkvæðagreiðslu þurfa að vera skýrar og í anda sjálfstæðs lífs. Kjörstjórnir og starfmenn þeirra þurfa að vera upplýst um mismunandi þarfir fatlaðs fólks, svo þau fái notið þessa grundvallar réttar að greiða atkvæði.
Nú er komin heimild til að nota rafræna kjörskrá, en í ákvæði um truflun á notkun hennar, er ekki að sjá að gert sér ráð fyrir að fatlaður einstaklingur lendi í því. Hér er þörf skýringa, og hlutverk aðstoðarmanns við kosinguna verður að vera skýrt, ekki síður en þekking kjörstjórna.
ÖBÍ hvetur dómsmálaráðherra til að gæta að því í tæka tíð og tryggja að allir fái notið atkvæðaréttar síns.
