Rúnar Björn Herrera Þorkelsson, formaður málefnahóps ÖBÍ um sjálfstætt líf
Sjálfstætt líf, húsnæðis- og aðgengismál fatlaðs fólk er það sem ég brenn mest fyrir persónulega. Þessi mál eru mikilvægustu áherslurnar fyrir stóra hópa fatlaðs fólks vegna þess að án þessara atriða er fólk fast í stofufangelsi heima hjá sér og þegar þú ert fastur í stofufangelsi heima hjá þér þá skipta nokkrar aukakrónur í veskið minna máli,“ segir Rúnar Björn sem einnig er formaður NPA-miðstöðvarinnar.
„Okkar helstu baráttumál hafa verið lögfesting og innleiðing NPA (notendastýrð persónuleg aðstoð) á Íslandi.“
„Lögfesting NPA náðist í gegn 2018 og innleiðingin er enn í gangi. Margar af þeim áherslum sem ÖBÍ lagði áherslu á náðust inn í lögin, reglugerðir og reglur sveitarfélaganna, með virku samráði. NPA-samningum hefur fjölgað, ekki eins mikið og þörf er á. Vitund fatlaðs fólks og almennings um hvað sjálfstætt líf er og um hvað rétturinn snýst, hefur aukist. Enn hefur ekki náðst það takmark að allt fatlað fólk fái þjónustu í samræmi við þarfir og vilja. Ég hvet fatlað fólk til að skoða hvort þau séu að njóta allra réttinda sem þau eiga og ef þau telji að svo sé ekki, þá láta í sér heyra.“
Einhver skilaboð til stjórnvalda?
„Réttindum frestað, er réttindum hafnað.“
