Fundur fólksins – ráðstefna almannaheilla

Fundur fólksins – Ráðstefna Almannaheilla verður í Hörpu fimmtudaginn 13. nóvember á milli klukkan 14:00 – 18:00 næstkomandi.

Stjórn Almannaheilla ákvað í fyrra að færa ráðstefnuna inn í Hörpu með það fyrir augum að hún hafi rými til að vaxa og þroskast á glæsilegum vettvangi næstu árin.

Harpa tók vel utan um fundargesti í fyrra en í ár eru gerðar nokkrar breytingar sem vonandi verða til góðs:

• Ráðstefnan er á fimmtudegi í stað föstudags.
• Ráðstefnan verður tekin upp en verður ekki í streymi. Við viljum fá fólk á staðinn því við trúum því að samstaða og samtal aðildarfélaga skipti máli.
• Aðildarfélögum Almannaheilla býðst að vera með bás og/eða eigin viðburð á ráðstefnunni endurgjaldslaust.
• Öll ráðstefnan fer fram á einu svæði; í aðalsalnum Kaldalóni, á Norðurbryggju (básasvæði) og í Vísu og Stemmu, aðliggjandi hliðarsölum.

Þá má nefna að stjórn Almannaheilla bindur vonir við að engar þingkosningar steli þrumunni að þessu sinni líkt og gerðist í fyrra, þegar kosningar voru settar á dagskrá daginn eftir ráðstefnuna með skömmum fyrirvara.