Hvatningarverðlaun ÖBÍ

Hvatningarverðlaun Öryrkjabandalags Íslands eru veitt ár hvert á alþjóðadegi fatlaðs fólks, 3. desember. Markmiðið með verðlaununum er að efla frumkvæði til nýrra verkefna og hugmyndavinnu og skapa jákvæða ímynd fyrir fatlað fólk. Forseti Íslands, Guðni Th. Jóhannesson, er verndari verðlaunanna.

Verðlaunin eru veitt í fjórum flokkum:

Einstaklingur
Fyrirtæki eða stofnun
Umfjöllun eða kynning
Verkefni innan aðildarfélaga ÖBÍ

Hvatningarverðlaunin eru veitt þeim sem hafa með verkum sínum stuðlað að einu samfélagi fyrir alla og endurspegla nútímalegar áherslur um þátttöku, sjálfstæði og jafnrétti fatlaðs fólks.

Hvatningarverðlaun 2018 í myndum

Hér eru nokkrar stemmingsmyndir frá verðlaunaafhendinguninni 2018. Sjá má fleiri myndir hér

Mynd 4 - formaður ÖBÍ og forseti Íslands

Ljósmyndari: Silja/Ljósmyndir Rutar og Silju

Tilnefningar til Hvatningarverðlauna ÖBÍ

Öllum er heimilt að senda inn tilnefningar. Lokadagur tilnefninga er 15. september ár hvert. Vilt þú senda inn tilnefningu?

Undirbúningsnefnd fer yfir allar tilnefningar og velur þrjá úr í hverjum flokki og skilar af sér til dómnefndar sem velur verðlaunahafana. Í dómnefnd sitja fimm manns og er leitast við að nefndin endurspegli samfélagið á sem bestan hátt.

Undirbúningsnefnd Hvatningarverðlauna 2019

Fríða Rún Þórðardóttir, Astma og ofnæmisfélag Íslands, formaður
Helga Magnúsdóttir, Sjálfsbjörg
Hrannar Björn Arnarson, ADHD samtökunum
Karl Þorsteinsson, Ás styrktarfélagi
Valur Höskuldsson, MND félaginu á Íslandi
Vignir Ljósálfur Jónsson, HIV-Íslandi

Starfsmaður nefndarinnar: Kristín Margrét Bjarnadóttir, ÖBÍ

Sagan

Hvatningarverðlaunin voru fyrst veitt 3. desember 2007 og hér má sjá og hlusta á hverjir hafa hlotið verðlaunin: Verðlaunahafar fyrri ára. Sjá einnig: Tilnefningar fyrri ára

Á fundi Evrópusamtaka fatlaðs fólks, European disability forum (skammstafað EDF) veturinn 2007, kom fram að Írar hefðu til fjölda ára veitt hvatningarverðlaun til þeirra sem hefðu sýnt frumkvæði í að bæta stöðu fatlaðra í samfélaginu. Þáverandi formaður ÖBÍ, Sigursteinn R. Másson sat fundinn og færði þessa hugmynd til síns fólks innan ÖBÍ, með það í huga að koma slíkum verðlaunum á hérlendis. Hugmynd formannsins var vel tekið og var ákveðið að stefnt yrði á að verðlaunin yrðu afhent á alþjóðadegi fatlaðra þann 3. desember.

Haustið 2007 tók undirbúningsnefnd Hvatningarverðlauna ÖBÍ til starfa og var ákveðið að hafa þrískipt verðlaun; í flokki einstaklinga, í flokki fyrirtækis og flokki stofnunar og að tilnefningar í hverjum flokki yrðu sex. Kallað var eftir tilnefningum frá aðildarfélögum ÖBÍ, þá 32 að tölu. Árið 2008 var ákveðið að tilnefningarnar yrðu eingöngu þrjár í hverjum flokki sem dómnefnd ynni úr. Þá var verðlaunaflokkunum breytt lítillega árið 2010. Tveir flokkar sameinaði í einn og þriðja flokknum bætt við og þá voru flokkarnir þessir: einstaklings, fyrirtækis/stofnun og umfjöllun/kynning. Árið 2018 bættist við fjórði flokkurinn: verkefni innan aðildarfélaga ÖBÍ.

Um verðlaunagripinn

Þórunn Árnadóttir vöruhönnuður hannaði verðlaunagripinn og hafði hún samfélagið í huga. Fólkið er byggingaeiningar eða púsl verksins sem er gert úr fjölda skífa. Með verkinu vill Þórunn koma á framfæri að: „...við eigum að opna fyrir alla tengimöguleika, ekki vera svo þröngsýn að við gerum ráð fyrir því að allir séu eins og passi í sama farið. Þetta á við um allt aðgengi að þátttöku í samfélaginu, hvort sem við erum að tala um samgöngur, samskipti eða viðskipti ...”